De SPIEKER-Koppel
„Snacken un Verstahn"

Siet 1986 is de Arbeitskoppel al togang, siet de Nordwest-Zeitung de plattdütsche Siet „Snacken un Verstahn" in de Welt sett hett. In dat Jahr 1995 hett se ok een Unnerdack gäven, wor'n elkeen Dingsdag in'n Maand to'n warkeln bi'nanner kamen kann. De Verdeenst van de Nordwest-Zeitung Ollnborg is, se hett nich blot Verlööf gäven, een Siet för Plattdüütsch praat to holen, se hett dat ok betto dörholln; Bewies, dat se de Spraak as Wert ankieken deit.

Noch läävt de ool Spraak un up männig Aart un Wies mutt är hulpen weern, dat se lebennig blieven deit. Betto is de beste Helpsmaat Redakteur Thomas Hellmold, de as Profi us Laien Stütt un Stöön gäven deit.

Dat Konzept för de Platt-Siet is de Mitarbeiters freestellt. Gedichte, Sachberichte van verscheeden Schrieverslü, ok eegen Texte, werd to een besunner Thema of een „Mischprogramm" utsöcht. Anbaden werd ok Seggwiesen, Narichten, Vorstellen van Böker un van Minschen, de sik mit Platt befaten doot.

Wecke Texte in't Blatt schöölt, dar ward över diskureert un afstimmt. Platt in all sien Klören un Dialektformen ward anbaden Wat wi de Läsers anbeden willt, kann'n rutläsen unner dat Editorial: „Lewe Läser". Een besunner Part is de Serie „Platt annerwägens" of „Platt un Naberspraak", wor Heinz Edzards de Bestmann för is.

Unner den Naam „Mien Gedicht" schall düütlik maakt weern, wecke Gedichte van plattdüütsch Schrieverslü wert sünd, dat se is vorstellt werd. Wi willt up besunner Qualität henwiesen, dat anner Lü dar ok Vermaak an finnen schöölt.

De plattdütsche Siet is nich blot för Platt-Kenner dacht, se schall ok för all de annern, de Platt tominnst bäten läsen, wenn ok nich jüüst snacken un schrieven doot, Intresse finnen. Betto hebbt wi in all de välen Jahrn allgemeen Tostimmung hadd.

Dar is een groot Flach to beackern, un de Mitmakers sünd vull Hapen, dat de Arbeit nich umsust is. Sunnerlik junge intresseerte Lü köönt villicht bi't Plattlehrn över de Schoolböker henut Stütt kriegen. Ok bi de Studenten schull dat Blatt Intresse finnen. Platt mutt nich ooltwelsch wäsen. Sik ut'nannersetten mit dat Nee'e, dat Verännem in us Welt, in us minschlik Läven, dat beschrieven un up henwiesen, kann'n ok in plattdüütsch Spraak. De Spraak mutt bruukt weern!

De Mitarbeiters van us Koppel
Heinz Edzards ut Ahlhorn, Detmar Dirks ut Großenkneten, Inge zur Horst ut Ofenerfeld, Elfriede Coburger ut Ollnborg, Franz Schwalm ut Bösel, Erhard Brüchert ut Ofen, Günter Kühn ut Ollnborg sünd all gode Facklü, hebbt as Schoolmesters of in armer Platt-Arbeitsstäen- un koppels Kenntnisse kregen, de se bi de Zeitungsarbeit mit inbringen köönt.

Nich vergäten weern schöölt de Vorgängers, so Annedore Christians, de de Koppel mit in'e Gang brocht hett, un Wiltrud Schauer. Denn weern dar fröher noch Gerda Bisbeck, Walter Helmerichs, Erich Haferkamp, Werner Kuper, Dr. Karsten Brandt mit bi.

Över de Arbeit in nu bald fiefuntwintig Jahr un över de Mitarbeiters kann'n naläsen in dat SPIEKER-Book „20 Jahre Snacken un Verstahn" (Isensee Verlag). Wi willt us nich sulben in'n Rahmpott kriegen, man wi dröövt stolt dar up henwiesen, dat in'n Juni-Maand de 300. Utgaav rutkamen ward. Villicht kien Grund to'n groot Jubileern - up je­den Fall to'n Wietermaken. Ahn intresseerte Läsers geiht dat nich.